ياعينى على اللى لقى نفسه فجأة عنده تسعين أو مائة سنة من غير مايحس ولايدرى بيهم خلصوا منه إزاى وإمتى وفين ولاعمل فيهم إيه.. عيل صغير فى حضن أمك..وبعدها تلعب فى الشارع وبعدها تدخل المدرسة والجامعة وتتخرج وتشتغل وتتجوز وتوصل لفوق وتفتكر نفسك حاجة.. لكن ولاحاجة..
قدروا يعرفوا سرعة الصوت والضوء كام لكن حياتك خلصت منك ومحدش قدر ولاهايقدر يحدد جريت بسرعة كام..مجرد فيمتو لحظة أو أقل تفتكر فيها إيه اللى حصل.. شريط سريع ملوش لون بيمر قدام عينك وانت بس مبحلق عاوز تشوف منه أى حاجة ومتقدرش..خلاص.. «فينيتو» ياحبيبي.. الست قالتلك «فات الميعاد» ..
تفتكر أبوك وأمك ونفسك تشوفهم تانى ولو فيمتو لحظة..لكن يادوبك تقف قدام حيطة وتدعيلهم وتمشي.. وتفتكر ماتش كورة شراب كسبتوا منه طقم فانلات ومعاه شلن لكل واحد..أو وانت قاعد فى بير السلم بتشرب سيجارة من ورا أبوك..أو واقف ورا شيش البلكونة مستنى حبيبتك تطلع البلكونة.. أو متشعلق فى باب الترماى من شارع شبرا أو الضاهر للسيدة زينب وترجع فيه تاني..أو تهرب من أبوك بالبيجامة عشان تتفرج على ماتش الأهلى فى الاستاد.. طيب وبعد ده كله كسبت إيه واستفدت إيه..شوية حسرة على اللى فات..وحبة خوف من اللى جاي..
صحيت بقالك كتير مابصتش فى المرايا..لقيت شعرك كله أبيض فى رمادى فى حتة سواد مش باينة..رقبتك بدأت تكرمش..كنت فاكر إنك راكب الحياة وبتتمخطر..ده إنت ركبت الهوا وبتجرى أسرع من أى حاجة فى الدنيا..وتبحلق فى المرايا ومش شايف أى حاجة قدام عينيك..
تدخل القهوة تتفرج على ماتش ريال مدريد ومتحسش بطعم البن على الريحة.. ووصلة الدش تقطع وتفتكر زمان أيام ماكنت بتقرا الجورنال الورق وتعرف منه أخبار الدنيا كلها إيه.. وتتفرج على قناتين بس فى التليفزيون لحد الساعة حداشر بالليل ويشطب..
تقعد على الكنبة تلبس الشراب وأنت باصص فى الأرض ويمر الشريط ويجرى ومتلحقش تشوف منه أى حاجة ولا إيه اللى فيه..وتلاقى نفسك ممدد فوق البلاط على ضهرك ومبحلق للسقف وانت مش فاكر ولافاهم أى حاجة..وكأنك طاير..!!
