تلقيت دعوة من «كوتش عبير الكيك» للانضمام إلى جروب على الفيس «رسائل من القلب» والذى تشرف عليه نهى زهرة «مستشارة تربوية، كوتش معتمدة فى العلاقات ومدرب علم نفس إيجابي، ومرشد تنمية شخصية» ومن طبعى عدم الانضمام إلى جروبات التواصل الاجتماعى الا نادراً؛ وتحت رغبة المعرفة قررت الانضمام.. بل وانقل لكم بعض ما قرأت.
التعافى مسئوليتك
التعافى رحلة أولها أصعب من آخرها، ملهاش كتالوج ولا وصفة سحرية ولا فيها ضمانات كافية، بتكتشف فيها نفسك من أول وجديد، وبتعيد ترتيب مقامات الناس جواك، وبتشوف الدنيا من منظور مختلف.
ماتستخسرش فى نفسك فرصة بداية جديدة، بعيدًا عن الألم داو نفسك بعيدًا عن المصادر اللى بتسببلك الوجع، دخّل حياتك أماكن وأشخاص جديدة أنضف وأحسن من اللى راح، اسمح لنفسك تعيش ألمك كامل وتجيب آخر كل المشاعر اللى جواك ووجعاك عشان يكون عندك طاقة تقوم وتبدأ من جديد. . «الوقت وحده لا يشفى الجروح العميقة التى تتركها الصدمات؛ الشفاء يتطلب الاهتمام، التفهم، والرحمة.»
لما تتعلم التجاوز هتعدّى على آلامك وهتفتكر المواقف اللى كنت فاكرها مأساتك وأسوأ شيء ممكن تمر بيه وهتحمد ربك إنك عديتها وعديت الأصعب منه وأنت مُحارب شجاع، ماخفش من مُواجهة نفسه، ولا ضيع عمره على اطلال علاقة أو شخص أو خسارة.
«الماضى ليس سجنًا يُحكم علينا بالبقاء فيه، بل هو كتاب يمكننا التعلم من صفحاته. لا تدع الذكريات المؤلمة تقيدك، بل اجعلها محطة تتعلم منها. واعلم أن كل تجربة، حتى وإن كانت مؤلمة، تُشكّل جزءًا من قصتك وتضيف إلى حكمتك.» عبدالوهاب مطاوع.. التعافى بيخلق منك بطل مش ضحية، التداوى بيخلق منك نُسخة أكتر رحمة ونُضج، ووعى..
رؤية الجمال
فى ناس عينها بتلقط الجمال فى كل حاجة، فى شخص لما تتكلم معاه عن موقف أو عن شخص تلاقى عينه شايفاه بشكل حلو لدرجة تحسسك بالسعادة والراحة من كتر ما هو عينه بتلقط أفضل ما فيهم.
اللى بيصنعُ الفارق بين قدرة الإنسان على رؤية الجمال أو وعدم الانتباه له، هو نقاء القلب ونضافته وجمال الروح وشفافيتها.. كما قال الجاحظ «إن أمر الجمالِ أرقُّ وأدقُّ من أن يُدركه كل من أبصره»
يكتمل جمال الإنسان عندما يعترف بالجمال فيمن حوله. اللى بيقدر يشوف الجمال والخير فى الناس اللى حواليه وعنده ما يكفى من الثقة فى النفس لإنه يمدح الناس بما فيهم من صفات هو فى الحقيقه بيتكلّم عن جمال قلبه هو.. فى مقولة حلوة بتقول «حينَ تعثُر عَلى الجَمال فِى قلبِك، ستعثُر عليْه فِى كلِّ قَلب»
شخص قادر يعرف إن الجمال له أشكال كتير، وقادر يلقطه ويعبر عنه ويحسه..
الجمال لا يُبصره إلا من حوى جزءًا منه..
..شكراً كوتش عبير شكراً شكراً كوتش نهي
