«البطولة علمتنا نثق فى أنفسنا.. ونشتغل كويس»
الدراسة مع الرياضة تحتاج تنظيمًا.. وأحلم بالالتحاق بالهندسة
> عرفينا بنفسك باعتبارك كابتن الفريق الذى شرفنا فى بطولة العالم برومانيا.. متى بدأتى لعب كرة اليد؟ ولماذا كان الاختيار هذه الرياضة بالذات؟
>> أنا ميرنا أشرف، كابتن منتخب مصر للناشئات مواليد 2008 و لاعبة بنادى باكوس بالإسكندرية، ألعب كرة اليد منذ الصغر واخترتها لأنها لعبة فيها روح جماعية، وليست مجرد مهارة فردية، لازم كل لاعبة تعرف دورها وتساعد اللى جنبها.
ومع الوقت حبيت اللعبة أكثر، خصوصًا إحساس اللعب باسم ناديك وبعد كده باسم منتخب بلدك، وده إحساس مختلف تمامًا.
> تلعبين فى مركز مهم هو صانع اللعب.. حدثينا غن أهم مواصفات هذا المركز؟ و الفرق بين اللعب فى النادى عن المنتخب؟
>> صانع اللعب لازم يكون عنده رؤية كويسة للملعب، ويعرف يقرأ دفاع المنافس ويقرر بسرعة هل يمرر؟ يخترق؟ ولا يصنع فرصة لزميله؟
وككابتن لابد من شخصية قيادية لأنه حلقة وصل بين المدرب واللاعبات جوه الملعب.
أما الفرق بين النادى والمنتخب، ففى النادى ألعب مع نفس المجموعة طوال الموسم وهناك وقت أطول للتدريب وبناء الانسجام، بينما المنتخب يجمع لاعبات من أندية مختلفة، لذا نحتاج التأقلم بسرعة وفهم بعض فى وقت قصير، وخصوصًا أن المسئولية أكبر لأننا نمثل مصر.
> هل هذه أول بطولة عالم تشاركى فيها؟ وما هو شعورك؟
>> شاركت قبل ذلك فى بطولة العالم ناشئات مواليد 2006 فى الصين سنة 2024، وبعدها شاركت مع منتخب الشابات مواليد 2006 فى بطولة العالم فى الصين سنة 2026، وده كان قبل مشاركتى فى هذه البطولة.
وبالتالى دى مش أول بطولة عالم، وده خلانى يكون عندى خبرة أكبر بأجواء البطولات العالمية.
> كرة اليد من الرياضات التى شرفتنا عالميًا وقاريًا، وعندما نشاهد منتخب الناشئات يحقق الأرقام قياسية ويفوز على مدارس كانت تمثل لنا عقدة مثل فرنسا. احكى لنا عن هذا الفريق وكيف أصبح عندنا منتخب قوى بهذا الشكل؟
>> أعتقد إن أهم حاجة بقى عندنا إيمان أكبر بنفسنا.
بقينا ندخل المباريات الكبيرة وإحنا مش بنفكر إن المنافس أقوى لمجرد إنه منتخب كبير، لكن بنفكر فى إمكانياتنا وإيه اللى نقدر نعمله.
> ما هى أهم تعليمات المدير الفنى الكابتن محمد عبدالكريم أثناء المباريات؟
>> أهم حاجة التركيز والالتزام بالخطة، وإننا نلعب كرة اليد بتاعتنا من غير خوف. المدرب يؤكد علينا إننا نلعب كفريق، ونثق فى بعض، وحتى لو حصلت غلطة أو خسرنا جزء من المباراة، نفضل مركزين ونرجع بسرعة.
> ما هى أهم الإنجازات التى تحققت وأهم طموحاتكم وأهدافك ككابتن الفريق؟
>> أهم إنجاز حققناه إننا أول منتخب عربى وأفريقى يصل للمربع الذهبى فى كأس العالم للناشئات، وهذا إنجاز كبير جدًا بالنسبة لنا وللكرة النسائية المصرية. كمان البطولة أكسبتنا خبرة كبيرة، سواء على المستوى الفنى أو النفسي، وخلتنا نعرف إحنا نقدر نوصل لفين لما نثق فى نفسنا ونشتغل كويس.
وطموحنا إننا نكمل بنفس الروح والتطور، وإن شاء الله فى كأس العالم للشابات بعد سنتين نقدر نحقق مركز أفضل، وليه لأ ننافس على اللقب ونجيب كأس العالم لمصر..
الهدف كبير، لكن بعد اللى حققناه فى البطولة، بقينا مؤمنين أكتر إن مفيش حاجة مستحيلة.
> ماذا عن دراستك وكيف تقومين بالتوفيق بين التدريب والدراسة؟
>> حصلت على الثانوية العامة هذا العام وأحلم بالالتحاق بكلية الهندسة.. الدراسة مع الرياضة تحتاج تنظيم.
لأن الرياضة تأخذ وقتا ومجهودا كبيرا، بينما الدراسة تحتاج تركيزا، أحاول أستغل أى وقت فاضى فى المذاكرة وأرتب أولوياتي.
طبعًا فى فترات البطولات يكون الموضوع أصعب، لكن أحاول عدم إهمال دراستي، لأن التعليم والرياضة مهمين بالنسبة لي.
> منتخب 2008 يعنى أن الكل إما فى أخر المرحلة الثانوية أو بداية الجامعة.. كيف تتعاملون مع الدراسة وكيف تقضون الإجازة؟
>> لسنا كلنا فى نفس المرحلة الدراسية، كل واحدة ظروفها وسنتها الدراسية مختلفة. هناك لاعبات فى الجامعة، ولاعبات لسه فى المدرسة، وبالتالى كل واحدة تحاول تنظيم وقتها حسب دراستها ومواعيد المعسكرات والتدريبات.
وبالنسبة لنا الإجازة لا تعنى التوقف تمامًا، لأن هناك تدريبات ومعسكرات وتجهيز للبطولات، نحاول نوازن بين الدراسة والمنتخب ونساعد بعض، وخصوصًا إننا كلنا عندنا نفس الهدف فى الآخر: رفع اسم مصر.
