أكتر حاجة تسعد كاتب المقالات لما يكون فيه رد فعل من مسئول أو مواطن أو قارئ..من أسبوعين كتبت عن ميدان ستنا نفيسة ومايحدث فيه والتلات اللى فات كتبت عن الحالة السيئة لشارع السد بالسيدة زينب.. وتلقيت اتصالاً سريعاً من المهندس إبراهيم صابر محافظ القاهرة ليرد على ماكتبته فى المقالين..وده أكبر دليل على أنه مسئول واثق فى نفسه ومتابع لكل شئ.. وهذا ماعرفته عنه منذ أن كان رئيساً لحى المعادى وكان لايجلس فى مكتبه إلا لتوقيع البوستة أو فى إجتماع..
قال المحافظ فى اتصاله: (قرأت ما كتبته.. بالنسبة لميدان السيدة نفيسة أطمنك إن فيه خطة لتطويروإعادة تنظيم المنطقة بالكامل وهايبقى فيه جراجات وفيه ربط بين منطقة السيدة عائشة والسيدة نفيسة والسلطان حسن وكمان الكوبرى بيتشال دلوقتي.. والناس الموجودة فى المكان هايتم التعامل معاهم.. وبالنسبة لشارع السد هاشوفه خلاص وهانظبطه.. ونلاقى الحلول بإذن الله).. وطبعاً فوراً المحافظ يوجه رئيس الحى بضبط شارع السد وبالليل قرأت فى الصفحة الرسمية لحى السيدة زينب على الفيس إن الحى عمل حملة مسائية لرفع الاشغالات من شارع السد.. وبعدها بيوم قرأت على الصفحة إن رئيس الحى اصطحب رئيس شركة الصرف الصحى ونزلوا شارع السد لمتابعة استكمال تنفيذ مشروع الصرف الصحى ثم رصف الشارع.. وإن ده بناء على طلبات المواطنين فى الحي.. وكأن الحى بيعمل كده من نفسه وكأن المحافظ لم يأمرهم بسرعة التحرك وإبلاغه بالوضع الميدانى الذى شرحته فى مقالى الأسبوع الماضي..طيب طالما عشان خاطر المواطنين أعرف أن مقر الحى فى شارع قدرى على بعد 500متر من شارع السد ولو مسئولو الحى كلفوا خاطرهم مرة واحدة واتمشوا لحد هناك وشافوا الوضع على حالته السيئة كان زمان مشروع الصرف خلص من بدرى والشارع اترصف والناس ارتاحت.. لكن احنا اتعودنا دايماً لازم المسئول الكبير يتدخل بنفسه سواء بسبب مقال أو شكوى مواطن ثم يعطى الأوامر وبعدها يتابع..
عموماً بعد ماكتبت المقالين اللى فاتوا تلقيت مكالمات من أهالى شارع حسنين دسوقى بالمعادى عاوزين المحافظ يتدخل ويشوفلهم حل فيه زى ماكان بيعمل زمان.. !!
