تقدم إمام عاشور لاعب وسط النادى الأهلى، باعتذار لجماهير القلعة الحمراء حيث كشف عن الأسباب التي منعته من السفر مع الفريق إلى تنزانيا لمواجهة يانج أفريكانز في الجولة الرابعة لبطولة دوري أبطال أفريقيا.
ووفقا لتدوينة نشرها على صفحته الشخصية بموقع التواصل الاجتماعي “انستجرام”، قال إمام عاشور “للأسف كلام كتير مغلوط وغير صحيح بيتردد بخصوص اللي حصل، وأنا متقبل أي قرار ياخده النادي، وواثق أنه المسئولين في الأهلي هيتفهموا موقفي كويس.. أنا فعلا عندي دور برد جامد ودرجة حرارتي عالية وتقلبات في المعدة بشكل غير طبيعي، وباخد مضادات حيوية. وللأسف كل أسرتي بتعاني من نفس الأعراض.. وأنا بلغت الدكتور أحمد جاب الله بظروفي الصحية وعدم قدرتي على السفر. وده إجراء غير كافٍ في مثل هذه الأمور”.
أضاف “لكن أخطأت بحسن نية وكان المفروض أتواصل مع الكابتن وليد صلاح الدين علشان يبلغ المدير الفني وتتعمل الإجراءات الطبية المتبعة عند التخلف عن السفر.. الموضوع اتقفل خلاص. وتواصلت امبارح بالليل مع الكابتن وليد صلاح الدين. وأنا تحت أمر النادي”.
وأوضح عاشور: “جمهور الأهلي سندي وضهري بعد ربنا سبحانه وتعالى. وبعتذر للنادي والجهاز الفني وزمايلي وقبلهم جمهور الأهلي. أنا فخور باللعب في أكبر نادي في أفريقيا. وعلاقتي بجماهيره العظيمة لا تقبل القسمة على اتنين..
وأرجو من الجميع إغلاق هذا الموضوع .. والناس اللي بتقول ان إمام عايز يلوي دراع النادي بقولهم حسبي الله ونعم الوكيل.. محدش يقدر يلوي دراع الأهلي. ولا يمكن أفكر بالطريقة دي أبدا .. وانا اتشرفت بارتداء الفانلة الحمراء وبقالي 3 سنين في النادي. والحمد لله عمري ما قصرت لا في حق النادي ولا جماهيره. وده حقهم عليا. ووجودي في الأهلي نادي القرن وفي ضهري جمهور الأهلي يعوضني عن كل حاجة.. عندنا ماتش بكره مهم. يارب كل التوفيق لزمايلي والجهاز الفني ونحقق الفوز اللي يسعد كل الأهلاوية”.
